تاج من إسراء .. مدونة حكومة اوف لاين

التاج ده اتبعتلى من ناس كتير

بس اللى فاكراه اسراء

ـــــــــــــــــــــــــــــــــــــــــــــــــــــ

بسمـ اللهـ نبدأ

قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟

أختار هذا العصر
لكن ليس هذا الحاكم إطلاقاً
واشمعنى

عشان بحب الناس دى وبحب التوقيت ده
مع انه مظلم بس الفجر جاى

أول أولوية فى حياتك عيلتك ولا شغلك ولا اصحابك؟

أعتقد أسرتى
ولو أنها بتختلف تبعا للظروف

ايه أكتر حاجة بتحبها فى رمضان ؟

أكتر أكتر حاجة بحبها فى رمضان
روحانيات العشر الأواخر
والإعتكاف فى المسجد وصلاة التهجد
بجد روووووووعة

اوصف أجمل فطار ممكن تفطره؟

أجمل إفطار ممكن أفطره بغض النظر عن ايه هو
بيكون مع أخواتى فى الكلية
ويا سلام لو كباية شاى بعده
انسوووووا
وكمان ممكن الإفطار مع بابا وماما وأخواتى ليه طعم تااااانى

لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟

إن شاء الله أجاهد نفسى أن أكون عادلاً
هتأكد لما أنزل للشعب بنفسى وأشوف البسمة فى وجوه الفقراء قبل الأغنياء
وأشوف شمس الإيمان بتشرق من تانى

مين أكتر اعلامى مصرى بتحترمه ؟

أكتر إعلامى بأحترمه بجد " منى الشاذلى " ، وكمان
محمود سعد ، وممممم فى ناس تانى بس مش فاكرة

وطبعا بأحب ابراهيم عيسى وبلال فضل وفهمى هويدى

والناس دى

لو ممكن تشتغل شغلانة تانية كنت تتمنى تبقى ايه ؟؟

محاورة صحفية

ايه تانى بلد تتمنى تعيش فيها بعد مصر ؟؟

ومين قال إنى عايشة فى مصر
أنا عايشة فى جمهورية " أبوكبير" المتحدة
لكن فى أماكن كتير جداً بحبها
بس مش أتمنى أعيش فيها
لأنى عشت مع الناس دى وحبيت الناس دى
ومش أقدر أبعد عنهم
تؤ تؤ تؤ

اوصف ترتيبات أجمل فرح ممكن تحضره ؟

أكيد طبعاً فرح إسلامى
مش فاضية أوصف ترتيبات بصراحة
بس الأكيد
[ أفراحنا جميلة وطاهرة حلال ... والناس للدين بتعود ]

بتراعى كلام الناس والقيل والقال ؟؟ ولو اه او لا قول ليه ؟

مش الحكاية باراعى ولا مبراعيش
بس فى حاجة أنا مؤمنة بيها
{ عندما يمدح الناس شخصاً فإن القليل ما يصدقون ذلك ،
ولكن عندما يذمونه فإن الجميع يصدقون }
مش اكتر
لكن مش بيشغل تفكيرى يعنى كلامهم




صحيت من النوم ما لقتش الموبايل ولا الكمبيوتر ولا الكاميرا الديجيتال ، ورجعنا لعصر الحمام الزاجل والحصنة .. هتكون سعيد ؟

لااااااااااااااااااااااااااااااااااااااااااا طبعاً
هممممم أنا باتكيف مع الوضع بسرعة
الموبايل واتسرق منى طبيعى ولسه عايشة من غيره واتكيفت
( بس هاجيب غيره يعنى )
والكمبيوتر قعد شهور بايظ مش متنا يعنى
والكاميرا الديجتال مش عندى طبيعى
بس ممكن أموت بحسرتى
قال حمام زاجل واحصنة قال

السعادة هى ..؟
الرضا بالمقسوم
{ علمت أن رزقى لا يأخذه غيرى فإطمئن قلبى }

لما بتحب تهرب من كل شئ بتروح فين ؟؟

بأروح على السرير
بس عادة مش بحب الهروب

امتى اول مرة خدت فيها نفس طويل وقلت ياااه انا فعلا كبرت ؟؟

تقريباً فى أولى جامعة
وممكن كمان لما سهيلة أختى الصغيرة بدأت تنادى :
[ أبلة / سارة ]
عجزتى الواحد يا سهيلة

بتشرب سجاير ؟؟ وايه شعورك اما ست او راجل بيشرب سجاير ؟ ليه ؟

الحمد لله الذى عافانا
بأشعر بمدى العبودية الذى وصل اليها ذلك الشخص لتلك السيجارة القذرة
ومدى ما يضر بها المحيطين به
( مش كفاية ذنب نفسه )
سبحان الله
اللهم اهدى السلمين أجمعين لما ترضى به عليهم

بتعرف ايدك اليمين من الشمال ازاى ؟

لا سؤال وجيه
أصل أنا عندى الايد اليمين فيها خمس صوابع
والشمال كمان فيها خمس صوابع
فالحمد لله بأعرفهم بقى بالطريقة دى
جربوا وادعولى هههههه

ايه اكتر الة موسيقية بتحبها ؟

تقريباً مش فى
لو افتكرت هاقلك






فى رأيك ليه الذوق والنخوة اتعدموا ؟

عشان المسلم بقى مسلم بالبطاقة بس

او زى ما النشيد بيقول
المسلم فين .. المسلم هنا .. هنا أهو .. أقله مين

{ وآلمنى وآلم كل حر ، سؤال الدهر :- أين المسلمون ؟؟!!! }

ايه الحاجة اللى لو حصلت هتبقى سعيد أوى ؟


لو اتخرجت من قسم الجغرافيا بالسلامة
هأعمل ساعتها كرملاية لكل مدون
ههههههههههههه




تحب يبقى عندك أرض زراعية ولا أجنس عربيات ولا كام عمارة ولا فلوس فى البنك ؟

مش عارفة




البحر ولا النيل ؟

بحب المياة عموماً
بحر أو نيل
بس ممكن يكون البحر أكتر
باتأمل فيه كتير


مركب ولا طيارة ؟

توك توك
ههههههههه

مجنون ولا عاقل ؟
والله كلك نظر
اللى انتى شايفاه

تتفرج على فيلم ولا تقرا كتاب ؟

والله على حسب الغزالة
بس ممكن اميل للقراءة اكثر

تمرر التاج ده لمين .. ؟

امرره لكل المدونين الجدد

بذرة أمل
بحلم بالحرية ... محمد جمعة
مش عارف
سيف مش معاهم
وبلا حدود
حلم الحرية .. أحمد عامر
وكل اللى عايز يجاوب عليه

اهلا وسهلا

يلا أى خدمة ( إثراء ) باشا