خواطر من أمام شاطئ الإسكندرية ... !!

" ALEXANDRIA " ... تلك المدينة التى أعشقها .. بل اهواها ..

أعشق هواها .. أعشق بحرها .. أعشق رمالها .. أعشق شوارعها .. أعشق كورنيشها ..

أعشق أهلها .. أعشق أسواقها .. أعشق معالمها الرائعة

{ مكتبة الإسكندرية ، قلعة قايتباى ، حديقة الأسماك ، المنتزة ، محطة الرمل ،

المنشية ، كورنيشها بامتداده ، وطبعاً "فتح الله" }

وعلى جانب شخصى

{ مقر اتحاد الأطباء العرب ، مركز ضحايا لحقوق الانسان }

انتظر الصيف بفارغ الصبر حتى يزف إلينا أبى ذاك الخبر السعيد :

أنا حجزت يا أولاد خلاص وهنروح اسكندرية ....

يصرخ الجميع هاتفاً : هييييييييييييييه ويبادر الجميع بتقبيل يد السيد الوالد

[ آآآآه منكو يا مصلحنجية ]

وبغض النظر فقد كانت تلك الأيام القليلة التى قضيناها هذا الصيف ـ والتى لم تتعدى العشرة أيام ـ لذيذة جدا .

وكان أطرف ما فيها ذلك الموقف الذى حدث لى على شاطئ بحر الاسندرية .

ــــــــــــــــــــــــــــــــــــــــــــــــــــــــــــــــــــــ

كنا نازلين البحر الساعة 7 صباحاً كده .. استعد الجميع وكل واحد لبس كاب

ايه ده فين طب فين بتاعى يا بابا ؟؟ حاضر خدى مفيش غير ده !!

مش لقيت غير كاب ازرق مكتوب عليه " الاخوان المسلمين " بالخط العريض وكمان الشعار فى النص .

أووووووبا هتودونا فى داهية ..

- بابا طب ينفع ألبسه كده ؟

- آه عادى مفيهاش حاجة البسيه عشان الشمس .. ولو رحتى فى داهية ولا أعرفك )):

وأول ما وصلنا البحر نزل الجميع المياة لأنه كان الصبح بدرى وكان البحر فاضى تقريباً

فضلت قاعدة لوحدى تحت الشمسية وينادوا عليا " يلا يا سارة المية لذيذة "

طيب حاضر خمسة كده ونازلة وراكو ...

ــــــــــــــــــــــــــــــــــــــــــــــــــــــــــــــــــــــــــــــــ

على الشمسية اللى على شمالى قاعد راجل وزوجته والبيبى بتاعهم ...

الراجل عمال يبص للكاب بشدة ونظرات مريبة كده .. قلت فى سرى : بس خلاص رحت فى داهية

بس خلاص هروح أسلم نفسى وأعترف على الجماعة المحظورة دى وخلاص ..

وهوووبا الراجل قام من مكانه ... ( الله أكبر ) طول بعرض بمجانص .. حاجة ترعب كده ..

[ أيوة عرفتك أكيد بودى جارد العادلى ]

لقيته جاى عليا .. قلبى وقع فى ركبى .. طب أجرى .. ولا أهرب .. ولا أجرى أنزل البحر معاهم ..

ولا أسلم نفسى .. لالالا عيب يا بت اجمدى كده واجهى الموقف ..

وبكل أدب قال : السلام عليكم ؟؟

- وعليكم السلام ، نعم أى خدمة حضرتك ؟

- أيوة حضرتك بس لو تسمحى أنا ومراتى بس كنا عايزين ننزل الميا

( طب وأنا مال أهلى يعنى ... !! )

فلو مفيهاش ازعاج تخلى البيبى ده معاكى شوية لحد مانطلع ...

احم احم المفاجأة عقدت لسانى وملحقتش أساساً أرد .. رمى البيبى جنبى وطار على المية

( يالهووووووى كارثة ... يا كابتن خد هنا ... )

قلت أكيد عشر دقايق ربع ساعة وهيطلع ياخد البييييييييبى .. يا رببببببببى !!! .. استرها

البيبى كان فى الشنطة بتاعته نايم فى هدوء ملائكى .. لكن مهلا انه هدوء ما قبل العاصفة

وتحولت سيادتى الى " أبلة شلبية " عادى بتحصل فى أحسن العائلات

يدوب الكابتن نزل المية حتى بدأ البيبى سيمفونية رائعة جدا من الصراخ الموسيقى الشرقى الأصيل

اضطريت طبعا ِيله واطبطب عليه تارة واقله هووووه هووووه تارة آخرى

ده كله فى محاولات فاشلة لاسكاته

( يا واد عيب اسكت بقى هتفضحنى )

ــــــــــــــــــــــــــــــــــــــــــــــــــــــــــــــــــــــــــــــــــ

طبعاً بابا وماما واخواتى فى المية يرمونى بنظرات السخرية وهيموتوا من الضحك

( اللى جابلك يخليلك يا أوختشى )

طبعا الأخ المبجل وزوجته عدى ربع ساعة نص ساعة ساعة ساعتين

والولد هيموت من كتر العياط والصراخ ، ناديت على مامته تطلع

يااااااه أخيراً هخلص من الكارثة دى ...

طلعت مامته من المية تقول ببرودة : سورى يا حبيبتى

( يا ستى لا سورى ولا بتاع بس خدى عتريس ده )

فوجئت بيها بتدينى شنطة وبتقلى خدى : ده اللبن بتاعه ابقى شربيه منه ..

وده أكله فى الببرونة .. ودى المناديل بتاعته .. ودى المية بتاعته .. ودى لعبه .. ودى .. ودى ..

كان ناقص تقلى ده البامبرز بتاعه غيريله

( شغالة عند أهلك أنا )

حسبنى الله ونعم الوكيل

ــــــــــــــــــــــــــــــــــــــــــــــــــــــــــــــــــــــــــــ

وهكذا تحولت من " أ / شلبية " إلى ماما / دادا ...

البيبى بيعيد .. أديله الرضعة .. أشربه .. أمسحله وشه بالمناديل

أديله اللعبة يلعب .. أتمشى بيه واطبطب عليه لو عيط عشان يسكت ..

والبية والهانم بيلعبوا فى المية لحد الساعة 11

وحضرتى قاعدة مصلوبة بسى / محمد باشا

وأخيراً خرج المحروس والمحروسة من المية ياااااااااااه أخيراً

جيت اديها ابنها ترد ببردو : سورى مش هاعرف اخده دلوقتى

عشان مبلولة مية مالحة .. استنى شوية انشف فى الشمس

لااااااااااااااااااااااا بجد مش معقول

قلتلها طب لو سمحتى خدى البيبى بقى لأنى مروحة الشقة

يااااااااااااااااااااه أخيراً خدته

أخيرا تخلصت منه

أخيرا حسيت بالحرية

والله الواحد فى نعمة هو مش حاسس بيها يا جدعان

جريت على الشقة ومنزلتش البحر فى اليوم ده ولا تانى يوم

ــــــــــــــــــــــــــــــــــــــــــــــــــــــــــــــــــــــــــــــــ

تانى يوم الضهر أسامة طالعلى الشقة بيقلى :

سااااااااارة انزلى بسرعة البحر ؟؟؟

ليه يا أسامة خير فى حاجة ؟؟

- اه الناس بتاعة امبارح بيسألو عليكى من الصبح

ـــــــــــــــــــــــــــــــــــــــــ

لا تعليق