هى ... وهو ... " 1 " .. !!

كنت عائدة آخر يوم فى الإمتحانات ... وكعادتى لازم ألحق القطر متأخر ... أو أروح ألاقيه فات اصلا .

المهم ، لحقت القطر الحمد لله ... واترميت على الكرسى من الإرهاق وقلت أهو الواحد ينام بقى لحد " أبوكبير" ولو كان الجو لطيف شوية

الواحد يكمل للزقازيق ( وإنشاله ما عن حد حوش ) ... ما علينا .

جه قعد فى الكرسى اللى قدامى فى المربع شاب فى حوالى العشرين من العمر تقريباً مجنتل نفسه ومروش على الآخر ..

ومن ساعة البيه ما قعد والموبايل بتاعة عمال يرن متواصل لحد ما يفصل ويرجع يرن تاااانى وتاااالت وراااابع وتعبيرات وجهه تنذر بخطر قادم ...

وما زال الموبايل يررررن ( يووووه يا عم رد بقى ولا اعمله صامت خلينا نعرف ننام بقى ربنا ينتقم من اليهود ) ، كان واضح جداً

إنه حد مش عايز يرد عليه ولا طايقه أصلاً أو عايز يذله الأول قبل ما يرد عليه .

وبعد حوالى ربع ساعة من الرن المتواصل أخينا رد ... أخييييييييييييييييراً ، طبعاً أول ما رد النوم طار من عينى

والفضول اشتغل ... يا ترى مين ده اللى طلع عينه قبل ما يرد عليه ؟؟؟

طبعاً القطر دوشة خالص وأخينا مش سامع حاجة فاضطر لفتح السبيكر


وإليكم نقل حى مباشر لتفاصيل الماتش ( آآقصد المكالمة ) : بسمـ اللهـ



أخينا ( برقة مفتعلة ) : السلام عليكم

أختنا ( بنرفزة ) : وعليكم السلام

هو ( برومانسية فظيعة محاولاً امتصاص غضبها ) : ازيك يا حبيبتى عاملة ايه ؟

هى ( وقد هدأت قليلاً ) : الحمد لله يا أستاذ .

( ثم عادت للإنفعال من جديد ) : ايييييييه يا أستاذ مش بترد عليا لييييه ؟؟؟

هو ( بسهوكة تفرس ) : والله يا روحى الموبايل كان صامت وماكنتش واخد بالى ... هو أنا أقدر يا عمرى ماأردش عليكى .

{ يا كذاب .. يا ابن ستين فى سبعين }


* المهم إن أخينا ده بيتكلم وفاتح السبيكر وواخد راحته ع الآخر ولا أكن فى بشر حواليه وعايش الدور خالص زى ما يكون قاعد بيكلمها من أوضته ومفيش حد جنبه ... يخربيت كده *


نرجع تانى للماتش

( آآقصد المكالمة )


هى ( بحزن رقيق ) : يا بكاش .. أيوه أيوه خدنى فى دوكة عشان أنسى اللى أنت عملته .. يااااه أنا بجد زعلانة منك أوى

بقى كده يهون عليك تقفل الخط فى وشى ؟؟؟

هو ( يفتعل الذهول ) : أنااااا يا حبيبتى ؟؟؟!!!

هى ( بدلع ) : آه أنت يا أحمد بجد بجد أنا زعلانة أوى .

هو : لالالا مش معقولة أنتى أكيد بتستهبلى ...

هى : لا يا شيخ ، ياه بجد دى آخر حاجة كنت أتوقعها منك .

هو (بآسى ) : لالالا أرجوكى متظلمنيش ده أنا تتقطه ايدى ولا اقفل الخط فى وشك يا حياتى .

هى : أيوه اضحك عليا بكلمتين زى عوايدك

هو : أناااا !!! الله يسامحك ... وبعدين على فكرة بقى أنا متأكد إن أنتى اللى قفلتى الخط فى وشى

وبتعملى كده عشان أنا اللى مش أزعل .

هى : أنا .. لا والله يا حبيبى

هو ( بأقصى رومانسية ) : ممكن بقى تسيبيكى من ده كله

( وبصوت خافت ) : وحشتينى ... وحشتينى أوووى .

هى ( وقد بدأت تستسلم ) : لو بجد واحشاك كنت سألت عليا .

هو : والله يا حبيبتى أنتى عارفة ظروف الإمتحانات ، ما تعذرينى بقى .

هى : ماشى يا أحمد إما أشوف آخرتها معاك .

هو ( بإبتسامة ماكرة ) : كل خير يا حبيبتى إن شاء الله .

هى : صحيح ، ايه الدوشة دى كلها ؟؟

هو : يااااه أنتى لسه واخدة بالك ... أصل أنا دلوقتى فى القطر مروح .

هى : ربنا يرجعك بالسلامة .

هو : ربنا يخليكى يا حياتى .. بصى بقى أنا قدامى كده ساعتين ولا حاجة وأكون فى البيت ، أول ما أوصل البيت وأغير هدومى كده وأدخل أوضتى وأقفل على نفسى .. هكلمك علطول أصلك واحشانى خالص ومش عارف أكلمك دلوقتى خالص .

{ يا نهاااااااار أبيض ده كله ومش عارف تكلمها يا مفترى ... امال لو عارف هتقول ايه ... !!! }

هى : ماشى يا حبيبى وأنا مستنياك ، خلى بالك من نفسك عشان خاطرى .

هو : حاضر ... لا اله الا الله

هى : محمد رسول الله

هو : السلام عليكم

هى : وعليكم السلام



_____________________________________________



وأول ما قفل الخط فوجئت ، بل صعقت بأخينا وقد خلع قناع الرومانسية المزيف ... ثم نفخ بشدة " هوووووووف " ورمى الموبايل على رجله بشدة ... وكأنه هم وانزاح .
{ يالهلى ، لما سيادتك مش طايقها أوى كده بتعمل كده ليه وبتقلها كل ده ليه }

ثم سند ظهره على الكرسى وسرح شوية كده ... والله والله بجد أنا ساعتها كان هاين عليا أولع فيه .
استنوا الحكاية لسه ما خلصتش ... الأصعب جاى فى الطريق
لقيت أخينا مسك الموبايل وبيتصل على حد تانى ...

تتخيلوا مين والمكالمة كان فيها ايه ... ؟؟؟

البوست الجاى هكمل الصدمة

ولا حول ولا قوة إلا بالله العلى العظيم

اللى يعلق على البوست يعلق على الموضوع ككل ... لكن ما حدش يعطى وجهة نظر فى أخينا ولا أختنا لحد ما نشوف المكالمة التانية فيها ايه ... وبعدين نشوف رأيكم فى الإثنين ...